കോഴിക്കോട്: കഴിഞ്ഞ പഞ്ചായത്ത് തെരഞ്ഞെടുപ്പില്‍ ഒഴികെ എക്കാലവും എല്‍ ഡി എഫിന് പിന്തുണനല്‍കിയ ജമാ അത്തെ ഇസ്ലാമി കിനാലൂര്‍ സംഭവത്തോടെയാണ് സി പി എമ്മുമായി അകന്നത്. കിനാലൂരിലെ ഉപഗ്രഹനഗര പദ്ധതി പ്രദേശത്തേയ്ക്കുള്ള നാലുവരി പാതയ്ക്ക് സ്ഥലം ഏറ്റെടുക്കാനുള്ള ഇടതു സര്‍ക്കാരിന്റെ നിലപാടാണ് ജമാ അത്തെ ഇസ്ലാമിയെയും ഇടതുപക്ഷത്തെയും അകറ്റിയത്. കിനാലൂരില്‍ നടന്ന പൊലീസ് നടപടിയില്‍ ജമാഅത്തെ ഇസ്ലാമി പ്രവര്‍ത്തകര്‍ അടക്കമുള്ളവര്‍ക്ക് മര്‍ദ്ദനമേല്‍ക്കുകയും നൂറുകണക്കിനാളുകള്‍ കേസുകളില്‍ പെടുകയും ചെയ്തു.
ഈ സംഭവത്തിന് ശേഷം ജമാ അത്തെ ഇസ്ലാമി തീവ്രവാദ പ്രസ്ഥാനമാണെന്ന് സി പി എം സംസ്ഥാന സെക്രട്ടറി പിണറായി വിജയന്‍ അടക്കമുള്ളവര്‍ ആവര്‍ത്തിച്ച് പ്രഖ്യാപിക്കുകയും ചെയ്തതോടെ സി പി എമ്മിന്റെ കടുത്ത ശത്രുവായി ജമാ അത്തെ ഇസ്ലാമി മാറി. കഴിഞ്ഞ പഞ്ചായത്ത് തെരഞ്ഞെടുപ്പില്‍ ജനകീയ വികസന മുന്നണിഎന്ന പേരില്‍ പാര്‍ട്ടി രൂപീകരിച്ച് തങ്ങളുടെ ശക്തി കേന്ദ്രങ്ങളില്‍ ജമാ അത്തെ ഇസ്ലാമി സ്ഥാനാര്‍ത്ഥികളെ നിര്‍ത്തുകയും ചെയ്തിരുന്നു.
തുടര്‍ന്ന് ജമാ അത്തെ ഇസ്ലാമിയുടെ യുവജന സംഘടനയായ സോളിഡാരിറ്റി ഇടതുസര്‍ക്കാരിന്റെ നയങ്ങള്‍ക്കെതിരെ ശക്തമായ പ്രചാരണപ്രവര്‍ത്തനങ്ങളും സമരങ്ങളുമാണ് നടത്തിയത്. ഇടതുപക്ഷവുമായി ഇനി ഒരു കാലത്തും യോജിക്കേണ്ടെന്ന് നിലപാടില്‍ എത്തിയ ജമാ അത്തെ ഇസ്ലാമി രഹസ്യമായി സി പി എമ്മുമായി ചര്‍ച്ച നടത്തിയെന്ന വിവരം ഈ സമുദായ സംഘടനയ്ക്കുള്ളില്‍ കടുത്ത വിഭാഗീയത സൃഷ്ടിച്ചിരിക്കുകയാണ്.
മാര്‍ച്ച് 20ന് ആലപ്പുഴ ഗസ്റ്റ്ഹൗസില്‍ പിണറായി വിജയനും ജമാഅത്തെ ഇസ്‌ലാമി അമീര്‍ ടി ആരിഫലിയും മറ്റ് ചില ജമാഅത്ത് നേതാക്കളും തമ്മില്‍ രഹസ്യ ചര്‍ച്ച നടത്തുകയും ഇതേതുടര്‍ന്ന് നിയമസഭാ തെരഞ്ഞെടുപ്പില്‍ ഇടതുമുന്നണിക്ക് പിന്തുണ നല്‍കാന്‍ ജമാഅത്തെ ഇസ്‌ലാമി തീരുമാനിക്കുകയും ചെയ്തുവെന്നാണ് ഹമീദ് വാണിമേല്‍ വെളിപ്പെടുത്തിയത്. ഈ വെളിപ്പെടുത്തല്‍ സി പി എമ്മിനുള്ളിലും കടുത്ത ആശയക്കുഴപ്പവും ചര്‍ച്ചകളും ഉണ്ടാക്കിയിട്ടുണ്ട്.
കഴിഞ്ഞ ലോക്‌സഭാ തെരഞ്ഞെടുപ്പില്‍ യു ഡി എഫ് സ്ഥാനാര്‍ഥികളായ ഇ ടി മുഹമ്മദ് ബഷീറിനും എം ഐ ഷാനവാസും ഒഴികെ മറ്റ് മണ്ഡലങ്ങളിലെല്ലാം തന്നെ ഇടതുമുന്നണി സ്ഥാനാര്‍ഥികളെയാണ് ജമാഅത്തെ ഇസ്‌ലാമി പിന്തുണച്ചിരുന്നത്. തദ്ദേശ സ്വയംഭരണ തെരഞ്ഞെടുപ്പില്‍ ജനകീയ വികസന മുന്നണി എന്ന ലേബലില്‍ ജമാഅത്തെ ഇസ്‌ലാമി സ്വന്തം സ്ഥാനാര്‍ഥികളെ നിര്‍ത്തി. രാഷ്ട്രീയത്തിലേക്ക് നേരിട്ട് കടക്കുന്നതിന്റെ ഭാഗമായി നടത്തിയ പരീക്ഷണമായിരുന്നു ഇതെങ്കിലും വലിയ ചലനങ്ങളൊന്നുമുണ്ടാക്കാന്‍ ജമാഅത്തെ ഇസ്ലാമിക്ക് കഴിഞ്ഞില്ല. മാത്രമല്ല പല മണ്ഡലങ്ങളിലും വളരെ കുറഞ്ഞ വോട്ടുകള്‍ മാത്രമാണ് ജനകീയ വികസന മുന്നണി സ്ഥാനാര്‍ഥികള്‍ക്ക് ലഭിച്ചിരുന്നത്. ഇതായിരിക്കാം സ്വന്തം പാര്‍ട്ടി എന്ന സ്വപ്നം തല്‍ക്കാലം അടക്കിവച്ച് വീണ്ടും മുന്നണികളുമായി വിലപേശല്‍നടത്താന്‍ ജമാ അത്തെ ഇസ്ലാമിയെ പ്രേരിപ്പിച്ചത്.

JIHPOLITIX