ന്യൂഡല്‍ഹി: രണ്ടു വര്‍ഷം നീണ്ട ചര്‍ച്ചകള്‍ക്കൊടുവില്‍ ജമാഅത്തെ ഇസ്ലാമി രാഷ്‌ട്രീയ പാര്‍ട്ടി രൂപീകരിച്ചു. ഇന്നലെ ഡല്‍ഹിയില്‍ നടന്ന രാഷ്‌ട്രീയ സമ്മേളനത്തിലാണ്‌ 'വെല്‍ഫെയര്‍ പാര്‍ട്ടി ഓഫ്‌ ഇന്ത്യ' എന്ന പേരില്‍ പാര്‍ട്ടി രൂപീകരിച്ചത്‌.
ജമാ അത്തെ ഇസ്ലാമിയുടെ കേന്ദ്ര ശൂറാ അംഗം മുജ്‌തബാ ഫാറൂഖിയാണ്‌ പ്രസിഡന്റ്‌. ജമാ അത്തിന്റെ ശൂറാ അംഗമായ എസ്‌.ക്യൂ.ആര്‍. ഇല്യാസ്‌ ഉള്‍പ്പെടെ അഞ്ചു ജനറല്‍ സെക്രട്ടറിമാരാണ്‌ പാര്‍ട്ടിക്കുള്ളത്‌.
മുജാഹിദ്‌ മടവൂര്‍ വിഭാഗത്തിന്റെ ദേശീയ സംഘടനയായ ഇന്ത്യന്‍ ഇസ്ലാഹി മൂവ്‌മെന്റ്‌ പ്രസിഡന്റ്‌ മൗലാനാ അബ്‌ദു വഹാബ്‌ ഖില്‍ജി, മുന്‍ ബി.എസ്‌.പി. എം.പി: ഇല്യാസ്‌ കാസ്‌മി, ചെങ്ങറ സമര നേതൃത്വത്തിലുണ്ടായിരുന്ന മലയാളിയായ ഫാദര്‍ എബ്രഹാം ജോസഫ്‌, മില്ലി ഗസറ്റ്‌ എഡിറ്റര്‍ സഫറുള്‍ ഇസ്ലാം ഖാന്‍, കര്‍ണാടക മുന്‍ മന്ത്രി ലളിതാ നായിക്‌ എന്നിവരാണ്‌ പാര്‍ട്ടിയുടെ വൈസ്‌ പ്രസിഡന്റുമാര്‍.
മലയാളിയായ പി.സി. ഹംസ, ആര്‍.ജെ.ഡി. മുന്‍ നേതാവ്‌ പ്രഫ. സുഹൈല്‍ അഹമ്മദ്‌ ഖാ ന്‍, പ്രഫ. രാമ പഞ്ചല്‍, ഖാലിദ പര്‍വീണ്‍ എന്നിവരാണ്‌ മറ്റു ജനറല്‍ സെക്രട്ടറിമാര്‍.
ജമാഅത്തെ ഇസ്ലാമി സംസ്‌ഥാനത്ത്‌ ആരംഭിക്കുന്ന പുതിയ ടെലിവിഷന്‍ ചാനലിന്റെ എം.ഡി: എം. അബ്‌ദുസ്സലാം ആണ്‌ ട്രഷറര്‍.
പ്രഫ. രാമസൂര്യ റാവു, അക്‌തര്‍ ഹുസൈന്‍ അക്‌തര്‍, അഡ്വ. ആമിര്‍ റഷീദ്‌, സുബ്രഹ്‌മണി എന്നിവരായിരിക്കും സെക്രട്ടറിമാര്‍. തങ്ങളുടെ കുറച്ച്‌ അംഗങ്ങള്‍ക്ക്‌ പാര്‍ട്ടിയില്‍ ചേരാന്‍ അനുമതി നല്‍കിയതിനപ്പുറം ജമാ അത്തെ ഇസ്ലാമിക്ക്‌ വെല്‍ഫയര്‍ പാര്‍ട്ടിയുമായി ബന്ധമൊന്നുമില്ലെന്ന്‌ പിന്നീട്‌ നടത്തിയ വാര്‍ത്താ സമ്മേളനത്തില്‍ എസ്‌.ക്യൂ.ആര്‍. ഇല്യാസ്‌ പറഞ്ഞു. തങ്ങളുടെ നിലപാടുമായി യോജിക്കുന്നവര്‍ക്കു പിന്തുണ നല്‍കും. അടുത്ത വര്‍ഷം നടക്കുന്ന ഉത്തര്‍പ്രദേശ്‌ തെരഞ്ഞെടുപ്പില്‍ സ്വീകരിക്കേണ്ട നിലപാടുകള്‍ ചര്‍ച്ച ചെയ്‌തു തീരുമാനിക്കുമെന്നും അദ്ദേഹം പറഞ്ഞു.
മൂല്യാധിഷ്‌ഠിതവും ധാര്‍മിക നിലവാരം പുലര്‍ത്തുന്നതുമായ രാഷ്‌ട്രീയമാണ്‌ വെല്‍ഫയര്‍ പാര്‍ട്ടി ലക്ഷ്യമിടുന്നതെന്നു ഭാരവാഹികള്‍ പറഞ്ഞു.
വൈവിധ്യങ്ങളെ ഉള്‍ക്കൊണ്ടുകൊണ്ട്‌ ജനാധിപത്യത്തെ ഊട്ടിയുറപ്പിക്കാനായിരിക്കും ശ്രമം. വികസനത്തിന്റെ ഗുണഫലങ്ങള്‍ എല്ലാ വിഭാഗത്തിലേക്കും എത്തുന്നുണ്ടെന്ന്‌ ഉറപ്പു വരുത്തും.
പാര്‍ട്ടി ഫണ്ടുകള്‍ സ്വീകരിക്കുമെങ്കിലും എന്തെങ്കിലും തരത്തിലുള്ള 'ചരടു'കളുള്ള ഫണ്ടുകള്‍ സ്വീകരിക്കില്ല. അംഗങ്ങളില്‍നിന്ന്‌ സംഭാവനയായാണു പ്രാഥമിക ഫണ്ട്‌ സ്വരൂപിച്ചതെന്നും ഇല്യാസ്‌ വ്യക്‌തമാക്കി.
0 comments:
Post a Comment
ഇതു വായിച്ചപ്പം നിങ്ങക്ക് എന്ത് തോന്നുന്നു. അതിവിടെ ടൈപ്പ് ചെയ്യൂ...അനുകൂലമായാലും പ്രതികൂലമായാലും.അംഗീകരിക്കാം വിമര്‍ശിക്കാം...അവഗണിക്കാന്‍ പരമാവധിശ്രമിക്കാതിരിക്കുക...