Wednesday, April 20, 2011

എസ്‌ഡിപിഐയുമായി സഖ്യത്തിനു ജമാഅത്തെ ഇസ്ലാമി


ബദ്ധവൈരികളായ പോപ്പുലര്‍ ഫ്രണ്ടുമായി ചേര്‍ന്നു പ്രവര്‍ത്തിക്കുന്നതിന്‌ ജമാഅത്തെ ഇസ്ലാമിയുടെ ശ്രമം. ജമാഅത്തെയുടെ നേതൃത്വത്തില്‍ രൂപീകരിച്ച പുതിയ രാഷ്ട്രീയ പാര്‍ട്ടിയായ വെല്‍ഫെയര്‍ പാര്‍ട്ടി ഓഫ്‌ ഇന്ത്യയും പോപ്പുലര്‍ ഫ്രണ്ടിന്റെ രാഷ്ട്രീയ പാര്‍ട്ടിയായ എസ്‌ഡിപിഐയും തമ്മില്‍ യോജിച്ചു പ്രവര്‍ത്തിക്കാനാണു നീക്കം. കഴിഞ്ഞ തദ്ദേശ സ്വയംഭരണ തെരഞ്ഞെടുപ്പില്‍ എസ്‌ഡിപിഐയുമായി സഹകരിക്കുന്നതിന്‌ ജമാഅത്തെ ഇസ്ലാമി ശ്രമിച്ചിരുന്നു. എന്നാല്‍ സംഘടനയുടെ കേന്ദ്ര ശൂറാ ( കൂടിയാലോചനാ സമിതി) ഇതിന്‌ അനുമതി നല്‍കിയില്ല. പുതിയ പാര്‍ട്ടി രൂപീകരിച്ചതോടെ സമാന സ്വഭാവമുള്ള മറ്റു പാര്‍ട്ടികളുമായിച്ചേര്‍ന്നു പൊതുവേദിയുണ്ടാക്കാന്‍ കേന്ദ്ര ശൂറയുടെ അനുമതി ലഭിച്ചേക്കുമെന്നാണു സൂചന. വൈകാതെ വെല്‍ഫെയര്‍ പാര്‍ട്ടി- എസ്‌ഡിപിഐ നേതാക്കള്‍ ഔപചാരിക കൂടിക്കാഴ്‌ച നടത്തും. 
എന്‍ഡിഎഫ്‌ രൂപീകരിച്ചതുമുതല്‍ അവരെ ശക്തമായി എതിര്‍ത്തുപോരുന്ന സംഘടനയാണു ജമാഅത്തെ ഇസ്ലാമി. പരമ്പരാഗതമായി ജമാഅത്തെയുടെ എതിര്‍ചേരിയില്‍ നില്‍ക്കുന്ന സുന്നി വിഭാഗങ്ങളുമായി യോജിച്ചാല്‍ പോലും എന്‍ഡിഎഫിനെ ഉള്‍ക്കൊള്ളാന്‍ കഴിയില്ലെന്നായിരുന്നു നിലപാട്‌. അതില്‍ നിന്നുള്ള മാറ്റം സംസ്ഥാനത്തെ മുസ്‌ലിം രാഷ്ട്രീയത്തില്‍ നിര്‍ണായകമായേക്കും. പിഡിപി. ഐഎന്‍എല്‍, പിടിഎ റഹീമിന്റെ നേതൃത്വത്തില്‍ സമീപകാലത്ത്‌ രൂപീകരിച്ച എന്‍എസ്‌ഡിപി എന്നിവയുമായിക്കൂടി ചേര്‍ന്നുള്ള പൊതുവേദിക്കാണു നീക്കം. ഐഎന്‍എല്‍ നേതാക്കള്‍ ഇന്നലെ ഡല്‍ഹിയില്‍ വെല്‍ഫെയര്‍ പാര്‍ട്ടി പ്രഖ്യാപന സമ്മേളനത്തില്‍ പങ്കെടുത്തു പിന്തുണ അറിയിച്ചിരുന്നു. പിഡിപി വര്‍ക്കിംഗ്‌ ചെയര്‍മാന്‍ അഡ്വ. അക്‌ബറലിയുമായി ജമാഅത്തെ നേതാക്കള്‍ കൂടിക്കാഴ്‌ച നടത്തിയിരുന്നു.
അതേസമയം. എസ്‌ഡിപിയെ നേതൃത്വം മനസു തുറന്നിട്ടില്ല. ജമാഅത്തെ ഇസ്ലാമിയുമായി സഹകരിക്കുന്നതില്‍ എസ്‌ഡിപിഐയിലെ ഒരു വിഭാഗത്തിനു താല്‌പര്യമില്ല. മുസ്‌ലിം ലീഗുമായുള്ള സഹകരണത്തിലാണ്‌ അവരുടെ താല്‌പര്യം. മാത്രമല്ല, സംഘടനയെന്ന നിലയില്‍ തങ്ങള്‍ക്കു കാര്യമായ ശക്തിയുണ്ടെന്ന്‌ എസ്‌ഡിപിഐ അവകാശപ്പെടുന്നുമുണ്ട്‌. ഈ തെരഞ്ഞെടുപ്പില്‍ സംസ്ഥാനത്തെ 80ല്‍ ഏറെ മണ്ഡലങ്ങളില്‍ മല്‍സരിച്ച എസ്‌ഡിപിഐ നേടുന്ന വോട്ടുകളെ അടിസ്ഥാനപ്പെടുത്തിയിരിക്കും അവരുടെ നിലപാട്‌.
മൂല്യാധിഷ്‌ഠിത രാഷ്ട്രീയത്തിനു പുതിയ കൂട്ടായ്‌മ എന്ന പേരിലാണ്‌ വെല്‍ഫെയര്‍ പാര്‍ട്ടി ഓഫ്‌ ഇന്ത്യ രൂപീകരിച്ചത്‌.


0 comments:

Post a Comment

ഇതു വായിച്ചപ്പം നിങ്ങക്ക് എന്ത് തോന്നുന്നു. അതിവിടെ ടൈപ്പ് ചെയ്യൂ...അനുകൂലമായാലും പ്രതികൂലമായാലും.അംഗീകരിക്കാം വിമര്‍ശിക്കാം...അവഗണിക്കാന്‍ പരമാവധിശ്രമിക്കാതിരിക്കുക...

Twitter Delicious Facebook Digg Stumbleupon Favorites More