കോഴിക്കോട്: ജമാഅത്തെ ഇസ്ലാമിയുടെ പിന്തുണ തേടി കോണ്‍ഗ്രസുമെത്തിയെന്ന് റിപ്പോര്‍ട്ട്. ജമാഅത്തെ ഇസ്ലാമിയുടെ സംസ്‌ഥാന അമീര്‍ ടി. ആരിഫ്‌ അലി സി.പി.എം സംസ്‌ഥാന സെക്രട്ടറി പിണറായി വിജയനുമായി ചര്‍ച്ച നടത്തിയെന്ന വാര്‍ത്തകള്‍ പുറത്തുവരുന്നതിനിടയിലാണ് കോണ്‍ഗ്രസുമായും ചര്‍ച്ച നടത്തിയെന്ന റിപ്പോര്‍ട്ട് പുറത്തുവരുന്നത്. ജമാഅത്തെ ഇസ്ലാമിയില്‍നിന്ന് രാജിവച്ച പൊളിറ്റിക്കല്‍ സെക്രട്ടറി ഹമീദ് വാണിന്മേല്‍ വഴിയാണ് പിണറായി വിജയന്‍ ടി ആരിഫ് അലിയെക്കാണാന്‍ എത്തിയിരുന്നുവെന്ന വിവരം പുറത്തുവരുന്നത്.
ജമാഅത്തെയുടെ പൊളിറ്റിക്കല്‍ സെക്രട്ടറിയെന്ന പദവിയില്‍നിന്ന് രാജിവയ്ക്കുന്നതിന് മുമ്പായി ഹമീദ് വാണിന്മേല്‍ ലീഗ് നേതാക്കന്മാരെ കണ്ടിരുന്നു. അപ്പോഴാണ് ജമാഅത്തെ ഇസ്ലാമിക്കെതിരെ തീവ്രവാദ ആരോപണം ഉന്നയിച്ച സിപിഎംനേതാക്കള്‍ ചര്‍ച്ച നടത്തിയ കാര്യം ലീഗ് നേതാക്കന്മാരെ അറിയിച്ചത്. പിണറായി വിജയനാണ് ചര്‍ച്ചയ്ക്കെത്തിയതെന്നും ഹമീദ് വെളിപ്പെടുത്തിയിരുന്നു. ലീഗ് നേതാക്കള്‍ നല്ലൊരു തിരഞ്ഞെടുപ്പ് വിഷയം കിട്ടിയ സന്തോഷത്തില്‍ അത് പുറത്തുപറയുകയും ചെയ്തു.
എന്നാല്‍ ഇതിനിടയിലാണ് പിന്തുണ തേടി കോണ്‍ഗ്രസ് നേതാക്കന്മാരും എത്തിയിരുന്നുവെന്ന ആരോപണം ഉന്നയിച്ചുകൊണ്ട് ജമാഅത്തെ ഇസ്ലാമിയുടെ നേതാവുതന്നെ രംഗത്തെത്തിയത്. തിരഞ്ഞെടുപ്പ് ധാരണ സംബന്ധിച്ച് ചര്‍ച്ച ചെയ്യാനായി കോണ്‍ഗ്രസ് നേതാവ് എം.ഐ.ഷാനവാസ് സമീപ്പിച്ചെന്ന് ജമാ അത്തെ ഇസ്‌ലാമി അമീര്‍ ടി.ആരിഫലി വ്യക്തമാക്കി.
ഇതോടെ ഇരുവിഭാഗവും പുറമേക്ക് തീവ്രവാദ ബന്ധം ആരോപിച്ച് മാറ്റിനിര്‍ത്തുന്ന ജമാഅത്തെ ഇസ്ലാമിയുമായി തിരഞ്ഞെടുപ്പ് ചര്‍ച്ചകള്‍ നടത്തിയെന്ന് വ്യക്തമായി. പിണറായി വിജയന്‍ ജമാഅത്തെ ഇസ്ലാമിയുടെ പിന്തുണ തേടിയതിനെ വിമര്‍ശിച്ചുകൊണ്ട് കോണ്‍ഗ്രസ് നേതാക്കന്മാര്‍ രംഗത്തെത്തിയതിന് തൊട്ടുപിന്നാലെയാണ് ടി ആരിഫലി ഈ വെളിപ്പെടുത്തലുമായി രംഗത്തെത്തിയത്.
നിയമസഭാ തെരഞ്ഞെടുപ്പില്‍ ആരെ പിന്തുണയ്ക്കണമെന്ന കാര്യത്തില്‍ തീരുമാനമെടുക്കാനിരിക്കുന്നതിനിടയിലാണ് വിവാദമുണ്ടായിരുന്നത്. തിരഞ്ഞെടുപ്പില്‍ സിപിഎമ്മിനെ പിന്തുണയ്ക്കാന്‍ തീരുമാനിച്ചതില്‍ പ്രതിഷേധിച്ചുകൊണ്ടാണ് താന്‍ രാജിവയ്ക്കുന്നതെന്ന് ഹമീദ് വാണിന്മേല്‍ പ്രഖ്യാപിച്ചിരുന്നു.

JIHPOLITIX